Payn Dayning ug 4 ka botelyang bino

Dili ni sya Indonesian o Malaysian nga ngalan.
Mahitungod ni sa kaon. Buraskang kaon.
Kanus-a ba to Merlinda?
Nakalimot ko sa petsa. Basta Gobernor's Nayt pud tong tungura apan wala jud ko nagpagabii didto kay gobernor. Duna mi'y gikabisihan sa Aruma, usa ka kapehan nga dunay waypay (internet bah!) diri sa dakbayan sa Iligan.
Kalit nga ningkusmaut ang dagway ni Merlinda, dayon miingon 'kaon kuno.'
"Asa? didto sa kay governor? Di ko uy. Layo na kaayo to para mukaon lang. Diri ra ta palit makaon..." subli ko niya.
"Dah, di uy. Dunay nangimbita. Manihapon noon ta ana. Libre nga payn dayning ni," matud ni Merlinda. Nakumbinsi sadko. Nindot man sad ng mang-geytkrash usahay bisan wah ko apil imbitaha.
Hipos dayun ang mga gamit, tiklop ang laptop ug notbuk dayon baktas mi gamay para makapangita og masakyan.
Tatay's Grill.
Ha, payn dayning jud ni.
Ninglingkod mi duol sa daku kaayo nga tibi.
"Uy, dong pwede ba ning istasyon sa tibi ibalhin sa GMA7. Unsa ba gud ning salida diri nga sabong sa manok man?" mando ni Merlinda sa mga trabahante sa kan-anan.
Taud-taud, ning-abot ang Tsaynis, aw Chinese, nga isponsor sa among payn dayning.
Arangkada order dayon si Merlinda, samtang ako gautingkay og payls sa akong notbuk.
Haskang daghana sa order uy. Burag walo gani ka tawo ang mukaon. Apan ang mga kauban sa Instik, tua ra galingkod sa ganghaan sa kan-anan. Saon? Geytkrash gani, dapat duna jud geyt nga ako i-krash. So, tua sila duol sa geyt gahulat.
Maibog jud ka. Mas payn pa ni nga kaon kay kang gobernor tingali.
Vegie soup with shrimps, baked seashell food, smokey fish, ug nakalimot ko sa uban. Basta super lami. Gituyo gani nako og englis ang sud-an aron makita jud ninyo ba kung unsa kalami.
Daghan kaayo mig-istorya.
Ang unang botilya sa bino nga gikan sa ubas, mga pag-ilaila dayon pagpangita og mga kumon nga maistoryahan. Katawa-tawa ni gamay.
Ang ikaduhang botilya sa bino gikan sa ubas, hala nagsugod na mi ug hinumdom sa mga nahitabo sa komperensya, nanglibak na mi og tawo, ug duna nay gamay nga mga pahiyum kay burag naka-relaks na man sa usag-usa.
Ang ikatulong botilya sa bino gikan sa ubas, medyo layt na kaayo ang among panghuna-huna kay magpuli-puli na man lang mi og pangihi sa CR. Daghan na jud nainom kay di na mapugngan sa pus-on ang pagka-kaihion. Diri nga botilya, langyaw na kaayo ang among mga pulong. Dolyares ang dating bisan naa mi sa Pinas. Ug ang nakalami ani nga botilya, gira sa Madalum-Munai sa Lanao del Norte na ang among giistoryahan. Mahubog jud ka sa guera!
Namalong na og suga ang Tatay's Grill. Ang nahimutangan na lang jud namo ang dunay kahayag.
Nagkasabot na mi nga muoli na kay gabii na jud pud. Tingpamahulay na.
Apan niingon ang Intsik, "usa pa ka botilya Dong."
"Ha? Usa pa? Okey ra ba ta?"
"Usa pa, last na lang ni," tubag sa Instik.
Nah, tingali na-ughan ni sa guera sa bukid kay gusto pa jud mudugang.
Hands up ko uy!
Surrender mi ni Merlinda, Tsik. Upat na ka botelya. Eksepsyunal jud ning payn dayninga, Tsik. Bahala kung Vietnamese ka o Chinese.
Tuod man nanguli mi nga wah nahurot ang ika-upat nga botilya sa bino..
Bug-at jud kaayo ako ulo pero "what could i say is that its manageable. Red wine, as I discover, cannot make me retarded, afterall."
Pag-abot sa balay, tulog uy. Tulog jud.
Di pa unta ko mobangon bisan udto-udto na. Apan naka-alarma na pud ang akong celpon. Tawo na karon ang mamukaw.
"Schedule nato day," gayawyaw si Merlinda.
"Lagi," tubag ko.
Pagkita namo, una pa si Merlinda gayawyaw "labad pa kaayo ang akong ulo..."
Hahaha.
Mao na ni. Payn dayning.