Kape sa bisita.

Taud-taud na ko gasige ug dukdok aning kompyuter. Dili. Dili ni guba.
Gisulat lang nako ang akong ginahuna-huna.
Sa tantong sinulat nako, nangita ang akong baba ug medyo pait-pait apan tam-is nga ilimnon.
Kape.
Gipudyot nako ang usa ka tasa nga diha nabutang o nahibilin sa akong atubangan. Aw, kung ang timpla muuyon sa akong pagtilaw, ako tingali ning kape nga nalimtan lang nako og inom.
Aaahhhh... okey ra jud. Ako kaha ning kape? Nagduha-duha ko.
Gibitbit nako ang puti nga tasa sa silong ug gipatong og ayo ibabaw sa piot nga lingkuranan sa usa ka bayk.
Gidagkutan nako ang usa ka sigarilyo. Gitutukan nako ang baga sa iyang tumoy ug gikumpara kini sa nagbaga nako nga huna-huna.
Mikalat ang asu sa akong palibot. Salamat sa mutampo og singhot aning asu ug makiglambigit sa sakit nga uban niani.
Uy, di pud ko ani ka kruwel uy.
Gika-istorya nako ang bugay kaayo nako nga amiga. Kanunay lang desperado ug prustrited sa kinabuhi. Sige'g kahigugma. Sige lang pud og kapakyas. Ambot kung ngano nga ga-sige lang siya'g trayal an eror sa iyang kasing-kasing. Dugmok na gud kaayo ang iyang pag-bati. Unsaon nalang na.
Pero iya man nang gipili. Di, iya pud ng problema.
Giinom naku ang kape.
Tunga-tunga na diay to sa tasa ang sulod.
Hapit na jud mahurot.
Naminaw ko sa panagbayluay og malamtik nga panghuna-huna sa akong mga kauban. Brayt jud nga pagkukabildo. Ang nga bugo nga naa didto, kalit lang pud nga na-brayt. Sige, istoryahe jud ang atong kalibutan; ang atong mga kahimtang; ang atong kahiusahan; ug ang atong mga solusyon sa nagkalain-laing mga problema.
Sa dihang dunay misyagit: "hoy, asa na tong tasa kay apilun nako ug hugas?"
Bura ra kog way nadunggan.
Padayon gihapon sila ug istorya sa ekonomikanhong problema sa nasud; problema sa sunod-sunod nga patay ug way pag-angkon kung kinsa jud ang mibuhat sa salaud...
Dunay mitalidhay, dunay nasuko, dunay gapakahilom lang, dunay ningpahiyum, dunay nalingaw...
"Uy, mao ning tasa sa taas nga gipatong sa lamisa?"
nanguhit ug nangutana ang usa ka staf.
"Kini?" gitudlo nako ang tasa ug giyaruk ang sulod tanan.
"Buang man ka. Nganong giinom man nimo ang inimnan sa atong bisita ganina?" nangutana'g balik ang staf nga burag seryoso nga burag dili.
"Kang kinsa man diay ni nga kape? Di ba diay ni ako?"
"Ambot lang nimo oi, ig-nan nga salin ni sa atong bisita ganina," mitubag sya dala pudyot sa tasa ug misulod sa kusina.
Taud-taud ko nga nakapiyong ug kalit nga ningkatawa. Natingala tanan ug silang tanan ningtan-aw sa akoa.
"O may Gad!"
Kape sa bisita.